ಶುಕ್ರವಾರ, ನವೆಂಬರ್ 4, 2016
ಸೂರ್ಯ, ಕನ್ನಡಿಯ ಒಡೆದಾಗ
ಸೋಮವಾರ, ನವೆಂಬರ್ 3, 2014
ಕನ್ನಡ ಕಲಿಸಿ ಕನ್ನಡ ಉಲಿಸಿ
ಸೋಮವಾರ, ಅಕ್ಟೋಬರ್ 13, 2014
ಗುರುವಾರ, ಜೂನ್ 13, 2013
ನಾನು ಬೋನ್ ಸಾಯಿ ಕೇಳಿ ನನ್ನ ಬಾಯಿ
ಚಿಗುರು ತುಟಿಯ
ತೆರೆದು ಜಗಕೆ ನುಡಿಯುವಾಸೆ
ಮಂಗಳವಾರ, ಅಕ್ಟೋಬರ್ 9, 2012
ಇಂದು ಅಂಚೆಯ ದಿನ , ಅಂಚೆಯಣ್ಣನ ನೆನೆಯಿತು ನನ್ನ ಮನ
ಹೊಡೆದು ಕರೆವಾ ಗೆಳೆಯ ಅಂಚೆಯಣ್ಣ
ಹೊತ್ತು ಭಾವದ ಕೋಶ ಹೊರಗೆ ಖಾಕಿಯ ವೇಷ
ತೆಗೆದು ಕೈಗಿಡುವನು ಭಾವ ಬಣ್ಣ.
ಹಿಂದೆ ನಾ ಚಿಕ್ಕವನು , ಅಂಚೆಯವ ಸಿಕ್ಕವನು
ಕೊಡುತ್ತಿದ್ದ ಕೈಗೆ ಕೌತುಕದ ಪತ್ರ
ಸುಖ ದುಃಖ ಸಾಲುಗಳ ಜೀವನದ ಸೋಲುಗಳ
ಹೊರೆಹೊತ್ತು ಬರುತ್ತಿತ್ತು, ಬರೆದಿರಲು ಮಿತ್ರ.
ಅಂಚೆಯಣ್ಣನ ದಾರಿ ಕಾದು ಸಹನೆಯು ಮೀರಿ
ಬರದಿರಲು ಕೋಪವದು ಏರುತ್ತಿತ್ತು
ತಡವಾದರೂ ಬಿಡದೆ ಮನೆಬುಡಕೆ ಬಂದಾಗ
ಮನಮೆಚ್ಚಿ ಮೊಗದಿ ನಗೆ ಬೀರುತ್ತಿತ್ತು.
ಪ್ರೀತಿ ಗೌರವ ಹೆಚ್ಚಿ ಅಂಚೆಯಣ್ಣನ ಮೆಚ್ಚಿ
ಒಳಮನೆಯ ಸತ್ಕಾರ, ಓಲೆ ಸಿಹಿಗೆ.
ಅಂಚೆಯಣ್ಣನ ಜಪಿಸಿ , ಬರಲು ಮನದಲಿ ಶಪಿಸಿ
ಕೈಗಿಟ್ಟ ಸಂದೇಶದಂಶ ಕಹಿಗೆ.
ಓಲೆ ಸರಕಿನ ಮರ್ಮ ತಿಳಿಯದಿರುವುದೇ ಧರ್ಮ
ಹೊರೆಹೊತ್ತು ನಡೆಯುವನು ಅಂಚೆಯಣ್ಣ
ನೆಂಟರೂರಿನ ಸುದ್ದಿ ಬರೆದ ನುಡಿಗಳ ತಿದ್ದಿ
ಕಳುಹುತಿಹ ರಾಯಸದಿ ರಸದ ಗಿಣ್ಣ.
ಬಿಸಿಲಿರಲಿ ಮಳೆಯಿರಲಿ ನಡುಗುವಾ ಚಳಿಯಿರಲಿ
ಅಂಚೆ ತಲುಪಿಸುವಲ್ಲಿ ಕಾರ್ಯಕ್ಷಮತೆ
ಹಳ್ಳಕೊಳ್ಳದ ದಾರಿ ಬೆಟ್ಟ ತುದಿಗಳ ಏರಿ
ಹಳ್ಳಿಗಾಡಿನ ಜನಕೆ ತೋರಿ ಮಮತೆ.
ದೂರದೂರಿನ ಮಗನ ಓಲೆಯೋದಲು ಬರದ
ಜನಗಳಿಗೆ ಕ್ಷೇಮವನು ಓದಿ ಹೇಳಿ
ಮಾಸ ಮಾಸಕೆ ಬರುವ ಸರಕಾರಿ ಪಿಂಚಣಿಯ
ಸಲುವ ವ್ಯಕ್ತಿಗೆ ಕೊಡುವ ಸಹನೆ ತಾಳಿ.
ಮೆಸೇಜು ಈ ಮೈಲುಗಳು ಕ್ಷಣದಿ ಸಾವಿರ ಮೈಲು
ಚಲಿಸಿ, ಪತ್ರದ ಸ್ಥಾನ ಕಸಿದು ಮೆರೆದು.
ಮಂದಗತಿಯಲೆ ಬರಲು ಹೃದಯ ಜೊತೆಯಲೆ ತರಲು
ಪತ್ರ ಒಳಸೇರುವುದು ಮನವ ತೆರೆದು.
ಮಾಡಿ ಪತ್ರದ ರೂಡಿ, ಪೆಟ್ಟಿಗೆಯ ಒಳ ದೂಡಿ
ಸ್ವೀಕರಿಸಿ, ಅನುಭವಿಸಿ ಅಂಚೆ ಸುಧೆಯ.
ಪತ್ರ, ಬಳಗದಿ ಗಂಟ ಬೆಸೆಯುತಲಿ ಸವಿನಂಟ
ಕ್ಷಣದೊಳಗೆ ಎದೆಯಲ್ಲಿ ಭಾವದುದಯ.
ಅಂಚೆಯಾ ದಿನದಂದು ಅಂಚೆಯಣ್ಣಗೆ ಒಂದು
ನಮನವನು ಮಾಡೋಣ ಪ್ರೀತಿ ತೋರಿ
ದಿನದ ವಿದ್ಯುನ್ಮಾನ ಮಾಧ್ಯಮದ ಹೊರಗೊಮ್ಮೆ
ಅಂಚೆಯಲಿ ವ್ಯವಹರಿಸಿ ಎಲ್ಲಸೇರಿ .
ಸೋಮವಾರ, ಅಕ್ಟೋಬರ್ 1, 2012
ತಾತನ ಪಥ
ಬುಧವಾರ, ಆಗಸ್ಟ್ 8, 2012
ದ್ವಾಪರದ ಶ್ರೀಕೃಷ್ಣ ದೇವನೆನಿಸಿಲ್ಲ
ದ್ವಾಪರದ ಶ್ರೀಕೃಷ್ಣ ದೇವನೆನಿಸಿಲ್ಲ
ವ್ಯಾಪಿಸಿರೆ ಕಣಕಣದಿ ಸರ್ವಮಾನ್ಯದ ಗುಣದಿ
ಮನುಜ ಶಕ್ತಿಯೆ ಎನಲು ಅವಗೆ ಮುನಿಸಿಲ್ಲ.
ವಿಷದ ಮೊಲೆಯನು ಉಂಡು ಸಾಯಲೆಳೆಸದ ಗಂಡು
ಪೂತನಿಯ ಕೊಂದಿರಲು ಗುದ್ದಿಗುದ್ದಿ
ವಿಕ್ರಮವು ಪೋರನ ನವನೀತ ಚೋರನ
ಪುರವೆಲ್ಲ ತುಂಬಿರಲು ಹೆಮ್ಮೆ ಸುದ್ದಿ.
ಅಂಬೆಗಾಲಲಿ ಹರಿದು ಬೆಣ್ಣೆ ಗಡಿಗೆಯ ಸುರಿದು
ಹಾಲು ಮೊಸರಲೆ ಬೆಳೆದ ಮುದ್ದು ತುಂಟ
ಕೊಂಬೆ ರೆಂಬೆಯ ತರಿದು , ಮಣ್ಣ ಬಾಯಿಯ ತೆರೆದು
ಅಮ್ಮನನು ಬೆಚ್ಚಿಸಲು ತುಂಬಿ ಕಂಠ.
ವಿಷಕಾರಿ ಹಾವಿನ ಉಪಟಳವ ತಪ್ಪಿಸಲು
ಹೆಡೆತುಳಿದು ಹೆದರಿಸುತ ಓಡಿಸಿರಲು
ಭಯದ ಸೆರಗಿನಲಿದ್ದ ಪುರಜನರ ಬಿಡಿಸಿದ್ದ
ಹಾವುನೋವಿನ ರಗಳೆ ಝಾಡಿಸಿರಲು.
ಗೋಪಿಕೆಯ ಜಡೆ ಎಳೆದು ಮೈಗೆ ಬೆಣ್ಣೆಯ ಬಳಿದು
ಗೋಳಿನಾಟವ ಆಡಿ ಮೆರೆದ ಪುಂಡ
ಜಳಕದಲಿ ಗೋಪಿಯರ ಕಂಡು ಪುಳಕಿತನಾಗಿ
ವಸ್ತ್ರಗಳ ಅಪಹರಿಸಿ ಕರೆದ ಭಂಡ.
ಏದು ರಕ್ಕಸ ತಂಡ ಕಾದು ದನಗಳ ಹಿಂಡ
ಹೈನುಗಾರಿಕೆಯರ್ಥ ತಿಳಿದ ಪೋರ
ಪ್ರೀತಿ ಮಳೆಯನು ಸುರಿಸಿ ಹಾಲು ಹೊಳೆಯನು ಹರಿಸಿ
ಗೋಕುಲವ ತಣಿಸಿರುವ ತಂತ್ರಗಾರ.
ವ್ಯವಹಾರ ಚತುರನಿವ ವ್ಯಾಪಾರ ಹೆಚ್ಚಿಸಿರೆ
ಗೋಕುಲದ ತುಂಬೆಲ್ಲ ಅರ್ಥ ಸಂಮೃದ್ಧಿ
ಪರ್ವತದ ಕೊಡೆ ಹಿಡಿದು ಇಂದ್ರನನು ನಾಚಿಸಿರೆ
ಪ್ರಕೃತಿಪೂಜೆಗೆ ನೀಡಿ ಚಲನೆ ಸುದ್ದಿ.
ಬೆಣ್ಣೆ ಕರಗಲು ಕೈಗೆ ಕೊಳಲು ಬಂದಿರೆ ಮೈಗೆ
ಹುಡುಗಾಟ ಹೊರಹೋಗಿ ಹರಯ ಬಂದು
ಅತೃಪ್ತ ರಾಧೆಯನು ನುಡಿಸಿ ಸವಿ ಸೋದೆಯನು
ಶೃಂಗಾರ ಯಮುನೆಯಲಿ ದಿನವು ಮಿಂದು.
ಕೊಳಲು ಕೈಯೊಳಗಿರಲು ಬಿಡದು ಪ್ರೇಮದ ನೆಳಲು
ಅರಿತು ಕೊಳಲನು ಇಡಲು ರಾಧೆಯಳಲು
ತ್ಯಾಗದಲಿ ಸಾಧನೆಯು ನೆನಪಿರಲು ವೇದನೆಯು
ಬಿಟ್ಟು ಹೊರಡಲು ಸ್ಮರಣೆ ಹೆಜ್ಜೆ ಮಳಲು.
ಮಾವ ಕಂಸನ ಕೊಲದೆ ಮಥುರ ನಗರಿಯ ಗೆಲದೆ
ಬದುಕು ದುಸ್ತರವಾಗಿ ಕಂಸವಧೆಯು
ಬಿಡಿಸಿ ಒದಗಿದ ವ್ಯಾಜ್ಯ , ಕೊಡಿಸಿ ಅಜ್ಜಗೆ ರಾಜ್ಯ
ಕಲಿಕೆ ಸಾಂದೀಪಿನಿಯ ಜ್ಞಾನಸುಧೆಯು.
ರಾಜ್ಯವನು ಗೆಲಿಸುವುದು ರಾಜನನು ನಲಿಸುವುದು
ರಾಜನಾಗುವ ಆಸೆ ತೋರಲಿಲ್ಲ
ತಂತ್ರಗಳ ಹೂಡುತಲಿ ರಾಜನನು ಮಾಡುತಲಿ
ಎಲ್ಲು ಒಂದೆಡೆ ಇನಿತು ಕೂರಲಿಲ್ಲ.
ಪ್ರೌಢಿಮೆಯ ಹಲಹಂತ ಸಾಗುತಿರೆ ಧೀಮಂತ
ಬೆಣ್ಣೆ ಕೊಳಲದು ಕಳಚಿ ಚಕ್ರ ಬಂತು
ದುಷ್ಟ ಶಿಕ್ಷಣಕೆಂದು ಶಿಷ್ಟ ರಕ್ಷಣವೆಂದು
ಉಗ್ರತಂತ್ರದ ಕಾರ್ಯ ಮಾಡಿ ನಿಂತು.
ದೇವಕಿಯ ಸಂಜಾತ ,ರುಕ್ಮಿಣಿಯ ಸಂಪ್ರೀತ
ಸತ್ಯಭಾಮೆಯ ನಿತ್ಯ ಮುದಗೊಳಿಸಿದವನು
ಮಹಿಳೆಯರ ಒಳಮನದ ಸೂಕ್ಷ್ಮತೆಗೆ ಸ್ಪಂದಿಸುತ
ಸಮತೆ ಭಾವವ ತೋರಿ ಹದಗೊಳಿಸಿದವನು.
ದ್ವಾರಕೆಯ ನಿರ್ಮಾಣ ವ್ಯವಹಾರ ಉಗ್ರಾಣ
ಅರ್ಥಕಲ್ಪನೆಗೊಂದು ನೀಡಿ ರೂಪ
ಕಡಲತೀರದ ನಗರಿ ವಹಿವಾಟುಗಳು ಚಿಗುರಿ
ಬಂದರಿನ ಬಾಂಧವ್ಯ ತಂದ ಭೂಪ.
ಬಡತನವ ಪ್ರತಿನಿಧಿಪ ಸುಧಾಮನಲಿ ಹುರುಪ
ತುಂಬಿ,ಮನೆಯಲಿ ಉಂಡು ಹಿಡಿಯ ಅವಲಕ್ಕಿ
ಸಂಕಷ್ಟದಲಿ ಅಂದು ದ್ರೌಪದಿಯು ಸಿಲುಕಿರಲು
ಅನ್ನ ಅಕ್ಷಯಗೊಳಿಸೆ ಹರುಷ ಉಕ್ಕಿ,
ಯುದ್ಧರಂಗದಿ ನಿಂದು ಬಂಧುವೆನ್ನದೆ ಕೊಂದು
ಗೆಲುವ ಗುರಿಯಾಗಿಸಲು ನೀಡಿ ಸ್ಫೂರ್ತಿ
ಯುದ್ಧದುದ್ದೇಶವೇ ಗೆಲವು ಮಾತ್ರವೆ ಎಂದ
ಗುರುವಾಗಿ ಕ್ಷಣಕ್ಷಣದಿ ನಿಂತ ಮೂರ್ತಿ.
ಸಮರ ಸನ್ನದ್ಧನಿಗೆ ಅಳುವೇಕೆ ಅಳುಕೇಕೆ
ಯುದ್ಧ ನೀತಿಯ ಬಿಡದೆ ತುಡುಗು ಎಂದ
ಭ್ರಮರ ಮತಿಯದು ಬೇಡ ನಿಶ್ಚಯಿಸಿ ಗುರಿಮಾಡ
ದುಷ್ಟ ಸಂಹಾರವೇ ಮುಖ್ಯವೆಂದ.
ಶನಿವಾರ, ಮೇ 12, 2012
ತಾಯಂದಿರ ದಿನಾಚರಣೆಯಂದು ಎರಡು ಚುಟುಕುಗಳು
ಶುಕ್ರವಾರ, ನವೆಂಬರ್ 4, 2011
ಹಕ್ಕಿ-ಹೂವು
ಹಸಿರು ಇಲ್ಲದಿದ್ದರೂ ಇದೆ ಉಸಿರು
ಒಣಗಿದ ಕೊಂಬೆ ಇಟ್ಟಂತೆ ಗೊಂಬೆ
ತುಂಬೆಲ್ಲ ಕಂಗೊಳಿಪ ಹಕ್ಕಿ ಹೂವು
ವಿಶ್ರಮಿಸಿ ಕೊಡುತ್ತವೆ ಕಾವು .
ಹೂವು ಅರಳುತ್ತವೆ ,
ರೆಕ್ಕೆ ಬಿಚ್ಚಿದಾಗ
ಮೊಗ್ಗಾಗುತ್ತವೆ , ಮುಚ್ಚಿದಾಗ
ರೆಂಬೆಗೊಂದರಂತೆ ಲೆಕ್ಕ , ಅರಳುವ ದಳಗಳೆ ಪುಕ್ಕ
ಹೂವಿಗೆ ಚಲನೆಯಿದೆ ಅತ್ತಿತ್ತ ಬಾಗುತ್ತವೆ
ಮತ್ತೆ ಕೂಗುತ್ತವೆ
ಪುನಃ ಸ್ವಸ್ಥಾನಕ್ಕೆ ಮರಳುತ್ತವೆ
ಹೂವು ಹಣ್ಣಾಗಿ ಬೀಜ ಕೊಡುವಂತೆ
ಹೂಹಕ್ಕಿ ಹಾಡಿ ಕೂಡಿ
ಬಿಳಿಹೂವ ಬೆಳೆಯುತ್ತವೆ
ಎಲ್ಲರ ಸೆಳೆಯುತ್ತವೆ.
ಶುಕ್ರವಾರ, ಏಪ್ರಿಲ್ 8, 2011
ಭಾವ - ಬಣ್ಣ
ಬದುಕು ಸಾರ್ಥಕಗೊಳಲು ಬಣ್ಣ ಬೇಕೆ ?
ಬಿಳಿಯ ಬಣ್ಣದ ತೊಗಲು ಒಲವು ಒಣಗಿರುವ ಕೆರೆ
ಭಾವ ಬಾಯಾರಿಕೆಗೆ ಬಣ್ಣ ಸಾಕೆ?
ಬಣ್ಣಗಳು ಬದುಕನ್ನು ಹಸನುಗೊಳಿಸುವುದಿಲ್ಲ
ಪ್ರೀತಿ ನೇಗಿಲು ಉಳಲು ಭಾವ ಬೆಳೆಯು
ಸಹಜತಯು ಮುತ್ತುತಿರೆ ಮಣ್ಣಗುಣ ಮೆತ್ತುತಿರೆ
ಮೂಲ ಸಾರವ ಹೀರಿ ಬರಲು ಕಳೆಯು.
ಬಣ್ಣಗಳು ಮೂಲದಿಂ ಬಂದಿರಲು ಬದಲಿಸಲು
ಸಾಧ್ಯವಾಗದು ಸದ್ಯ, ಭಾವ ಮುಖ್ಯ
ಜೀವನದ ಕುಣಿಕೆಯಲಿ ಭಾವವೆಮ್ಮೆಣಿಕೆಯಲಿ
ಒಲವಿನಲಿ ಬೆಸಗೊಳಲು ಬೇಕು ಸಖ್ಯ.
ಕರಿಯನೋ ಬಿಳಿಯಳೋ ಬಣ್ಣಗಳು ಬೇಕಿಲ್ಲ
ಬಾಳು ಸಿಂಗರಗೊಳಲು ದ್ವೇಷ ನೂಕಿ
ಬಿಳಿಯಳೋ ಕರಿಯನೋ ಭಾವಗಳು ಯಾಕಿಲ್ಲ
ಬಾಳಬೇಕಿರುವ ದಿನ ಮೂರು ಬಾಕಿ.
ಒಲವು ಒಡಲೊಳಗಿರಲು ಮೈಬಣ್ಣವೆಂತಿರಲಿ
ಬಣ್ಣದೋಕುಳಿಯಾಟ ಬದುಕರಂಗ
ನಲವಸವಿ ನವಿಲಗರಿ ಮನದಲ್ಲಿ ಬಿಚ್ಚದಿರೆ
ಬಣ್ಣಬಣ್ಣದ ಕನಸು ಪೂರ್ಣ ಭಂಗ.
ಸೋಮವಾರ, ಏಪ್ರಿಲ್ 4, 2011
ಚೈತ್ರಚುಂಬನ
ಪರಿಮಳದ ಜಾಡಿನಲಿ
ಕೋಗಿಲೆಯ ಹಾಡಿನಲಿ
ಚಿಗುರು ಚುಂಬನ ತುಟಿಯ ತುಂಟಿ ಚೈತ್ರ
ಬಣ್ಣ ಬಣ್ಣದ ಉಡುಪು
ತುಂಬು ಫಲಗಳ ಹಿಡಿಪು
ಭಾವಜೀವಿಗೆ ಮುಡಿಪು
ಮನವ ಸಾವಿರ ಸೆಳೆದ ಚೆಲುವ ಜೈತ್ರ
ಇಡಲು ಚೆನ್ನಡಿ ಕೆಳಗೆ
ಸುರಿವ ಸುಮಗಳ ಮಳೆಗೆ
ಕಣ್ಣು ತುಂಬಲು ಕಳೆಗೆ
ಭುವನಸುಂದರಿ ಬರುವು ಕೊಟ್ಟ ಸುಳಿವು
ಆಗಸದ ಕಡುನೀಲಿ
ಹೂಗೊಂಚಲಿನ ಡೋಲಿ
ಪ್ರಾಯಪ್ರೇಮದ ಕೇಲಿ
ಮುಳುಗಿ ಏಳಲು ನವುರ ಹರಯ ಕೊಳವು
ಮಾವು ಬೇವಿನ ಚಿಗುರು
ಅರೆಗಾಯಿಗಳ ಒಗರು
ಘಮಿಪ ಮರಗಳ ಅಗರು
ಸೂರ್ಯ ರಶ್ಮಿಯು ಇಳೆಗೆ ಸುರಿವ ಝಳವು
ಮಂಗಳವಾರ, ಸೆಪ್ಟೆಂಬರ್ 7, 2010
ಗ್ರಹಣ ವಿಜ್ಞಾನ
ಬಾನಿನಂಗಳದಲ್ಲಿ ಚಣಕಾಲ ನಡೆಯುವುದು
ನೆಳಲು ಬೆಳಕಿನ ಚೆಲುವ ಆಟ
ನಯನಗಳ ಎದುರಿನಲಿ ನಯವಾಗಿ ತೋರುವುದು
ಗಗನ ವೈವಿಧ್ಯದಾ ಸವಿಯ ಊಟ.
ಯಾವುದೋ ವೇಗದಲಿ ಯಾವುದೋ ಜಾಗದಲಿ
ಸಂಧಿಸಲು ಕಾಯಗಳ ದಿನದ ಪಯಣ
ಸೇರುವಾ ದಿನಬರಲು ಸಂತಸದ ಸವಿತರಲಿ
ಗ್ರಹಣ ಗಗನದೆಡೆಗೆ ಹರಿವ ನಯನ.
ಭೂಮಿ ಸೂರ್ಯನ ನಡುವೆ ಚಂದ್ರ ಕುಣಿಯುತ ಬರಲು
ಸೇರುತಲಿ ಕಾಯಗಳು ಸರಳರೇಖೆ
ಚಂದ್ರನಾ ಇಡಿನೆರಳು ಭೋಮಿಯಲಿ ಬಿದ್ದಿರಲು
ಗ್ರಹಣದಧ್ಯಯನಕ್ಕೆ ತೆರೆದಶಾಖೆ.
ಅಡ್ಡನಾಗಲು ಚಂದ್ರ ರವಿಯ ಮರೆಯಾಗಿಸುತ
ಅರ್ಧಭೂಮಿಯ ಮೇಲೆ ಹಗಲುಮಾಯ
ನೆಳಲು ಬೆಳಕಲಿ ನಡೆವ ಚಿತ್ರವೈಚಿತ್ರ್ಯಕೆ
ಚಲನೆ ಕಾರಣ ಮೂಲ ಗಗನಕಾಯ.
ಗ್ರಹಣವಾಗುವ ಮೊದಲು ಬೆಳಕ ದೋಣಿಯನೇರಿ
ಯಾರೊ ಬಂದರು ನೆರಳ ಪರದೆ ಹಿಡಿದು
ಗ್ರಹಣ ಕರಗಲು ಹಿಡಿಯೆ ವಜ್ರದುಂಗುರ ತೋರಿ
ಮುಂದೆ ನಡೆದರು ಬೆಳಕ ಪ್ರೀತಿ ಮಿಡಿದು.
ಬೆಳಕ ಕಾಯಗೆ ಬೇಕು ಗ್ರಹಣವಾಗಲು ತಡೆಯು
ಅದಕೆ ಉಪಗ್ರಹದ ಬಲ ಸನಿಹವಿರಲು
ತಡೆಯು ಇಲ್ಲದೆ ಗ್ರಹಣ ಬರಿದೆ ನಿತ್ಯದ ಭ್ರಮಣ
ಸೊಗಸ ಸಂಪೂರ್ಣತೆಯು ಕೊರಗುತಿರಲು.
ಜಗದ ಕಾಯಕ ನಿತ್ಯ ಗಗನ ಕಾಯದ ಸತ್ಯ
ತಿಳಿಸುವುದು ಈ ತೆರನ ವಿದ್ಯಮಾನ
ಸಿಗಲು ಮಾಹಿತಿ ಇಂಥ ಸರಿಯುವುದು ಕತೆ ದಂತ
ಅಳಿಸುವುದು ಮೌಢ್ಯವನು ನೀಡಿ ಧ್ಯಾನ.
ಮೌಡ್ಯ ನಂಬಲುಬೇಡಿ ಸೂಕ್ಷ್ಮತನದಲಿ ನೋಡಿ
ರವಿಯ ನುಂಗಲು ಬಹನು ಕೇತುವಲ್ಲ
ಮೂಲ ಬೆಳಕಿನ ನಡುವೆ ಮರೆ ಇರಿಸುವಾ ನೆರಳು
ಗ್ರಹಣವಾಗಲು ಕೇತು ಹೇತುವಲ್ಲ.
ಬರಿಯ ಕಣ್ಣಲಿ ರವಿಯ ನೋಡುವುದು ನಿಲ್ಲಿಸಿರಿ
ಪ್ರಖರ ಬೆಳಕಿನ ಕಿರಣ ಸುಡಲು ಸಾಕು
ಪರಿಸರದ ಮೇಲೆಲ್ಲ ಪರಿಣಾಮ ಬೀರಿದರೆ
ಎಂದಿನಂತೆಯೆ ಬಾಳು ನಡೆಸಬೇಕು.
ಗುರುವಾರ, ಜುಲೈ 22, 2010
"ಸ್ಕೂಲಿನ ಅಸೆಂಬ್ಲಿಯಲ್ಲಿ ಓದಲು ಪ್ರಪಂಚದ ಏಳು ಅದ್ಭುತಗಳ ಬಗ್ಗೆ ಒಂದು ಕವನವನ್ನು ಬರೆದುಕೊಡು ಅಪ್ಪಾ" ಎಂಬ ಮಗಳ ಒತ್ತಾಯಕ್ಕೆ ಬರೆದ ಗೀತೆಯಿದು.
ಅದ್ಭುತ ಗೀತೆ
ವಿಶ್ವದಲ್ಲಿನ ಏಳು ಅದ್ಭುತ
ಪದ್ಯ ರೂಪದಿ ಹೇಳುವೆ
ಮನವು ಹರುಷಕೆ ಆಗಿ ಗದ್ಗದ
ನೆನಪನೊಮ್ಮೆಗೆ ಊಳುವೆ
ಗೀಜಾ ಪಿರಮಿಡ್ ಬಹಳ ಹಳೆಯದು
ನಂಬಿಕೆಯಾ ಪ್ರತೀಕವು
ಗ್ರೀಕ ದೇಶದ ಹೆಮ್ಮೆ ರಚನೆಯ
ನೋಡುತಿರೆ ಮನ ಮೂಕವು
ಮಾಚುಪಿಚ್ಚು ಇಂಕ ಜನರ
ಮನದ ಸಂಸ್ಕೃತಿ ತಿಳಿಸಲು
ಪೆರುವ ಜನಗಳ ನಾಗರೀಕತೆ
ಪ್ರಕೃತಿ ಪ್ರೇಮವ ಬೆಳೆಸಲು
ಚೀನ ದೇಶದ ಮಹಾಗೋಡೆಯ
ಒಮ್ಮೆಯಾದರು ನೋಡೆಯ
ಮನುಜ ನಿರ್ಮಿತ ಮಹದ್ರಚನೆಯ
ಹೃದಯ ತುಂಬಿ ಹಾಡೆಯ
ಇಟಲಿ ದೇಶದ ರೋಮ ನಗರದ
ರಂಗ ಮಂದಿರ ಸುಂದರ
ಕೊಲೆಸಿಯಂನ ಸೌಧ ವೈಭವ
ಜ್ಞಾನ ಕಲೆಗಳ ಹಂದರ
ಜೋರ್ಡನ್ ದೇಶದ ಪೆಟ್ರ ಕೆತ್ತನೆ
ನೋಡೆ ಮೈ ನವಿರೇಳಲು
ಮರಳ ಕಲ್ಲಲಿ ಕಲೆಯ ಬಿತ್ತನೆ
ಸಂಸ್ಕೃತಿಯ ಸವಿ ಹೇಳಲು
ಬ್ರೆಜ಼ಿಲ್ ದೇಶದ ಕ್ರಿಸ್ತ ಪ್ರತಿಮೆಯು
ಗಾತ್ರದಲಿ ಇರೆ ತಾರಕ
ಶಾಂತಿ ಮಂತ್ರವ ಪಠಿಸಿ ನಿಂತಿರೆ
ಒಲವ ಜಗದೋದ್ಧಾರಕ
ನಮ್ಮ ದೇಶದ ಹೆಮ್ಮೆ ನೋಡಲು
ಮನವು ತುಂಬುತ ನಲಿವುದು
ತಾಜಮಹಲಿನ ಕೀರ್ತಿಹಾಡಲು
ಷಹಜಹಾನಗೆ ಸಲುವುದು
ಮನುಜಯತ್ನದ ಏಳು ಅದ್ಭುತ
ಹೀಗೆ ಕವನದಿ ಹಾಡಿದೆ
ಕಾಲಧನುಜನ ವಿಕಟ ದಾಳಿಗೆ
ಬಿರುಕು ಕೆಲವೆಡೆ ಮೂಡಿದೆ.
ಬುಧವಾರ, ಜೂನ್ 9, 2010
ಮುಂಗಾರು ಮಳೆ
ಎಡಬಿಡದೆ ಸುರಿಯುತಿದೆ
ಮುಂಗಾರ ಮೊದಲಮಳೆ
ಕುಡಿಯೊಡೆದು ಚಿಗುರುತಿದೆ
ಕಾದು ಕರಟಿರುವ ಗರಿಕೆ ನೆಲ
ಕವಿದ ಕಾರ್ಮೋಡಗಳ ಸೀಳುತಿದೆ
ಗುಡುಗು ಸಿಡಿಲುಗಳ ನಾರಾಚ
ಕಿವಿಗಪ್ಪಳಿಸುತಿದೆ ಬಿಡದೆ
ಭೋರ್ಗರೆವ ಮಳೆಯ ಅಹಿತರಾಗ
ಕವಿದ ಮೇಘಗಳ ಹಂದರಕೆ
ಹಗಲು ಇರುಳಾಗಿದೆ
ಸುರಿವ ಮಳೆಯ ಪ್ರಭಾವಕೆ
ತೊರೆಯುಕ್ಕಿ ಪ್ರವಹಿಸುತ್ತಿದೆ
ಝರಿಯ ಹನಿಯ ನಿಬಿಡತೆಗೆ
ಗೂಡ ಸೇರಿವೆ ಜೀವ ಸಂಕುಲವು
ಹರಿವ ನದಿಯ ಚೆಲುವಿಕೆಗೆ
ನವಿರೇಳುತಿದೆ ಮೈಮನವು
ಉಗಿದೇಳ್ವ ಸಿಡಿಲ ಆರ್ಭಟಕೆ
ಬಿರುಕೊಡೆಯುತಿದೆ ಎದೆಯೊಳು
ಪುಟಿದೇಳ್ವ ಬುಗ್ಗೆಯಂದಕೆ
ಹಗುರಾಗುತಿದೆ ಹೃದಯವು.
ಬುಧವಾರ, ಜೂನ್ 2, 2010
ಮರುಜೀವ
ನೀನು ಜೊತೆಗಿರಲು
ಭಾವ ಅಡಗಿಹ ಗೋರಿಯಲಿ
ಹಲವು ಕತೆಯಿರಲು.
ನಿನ್ನ ಮೆಚ್ಚುತ ಹೇಳುವೆನು
ಭಾವ ಕೊಂದವರ
ನೆನಪ ಮರೆವಲಿ ಹೂಳುವೆನು
ಜೀವ ತಿಂದವರ
ಚೆಲುವನರಸುತ ಬಂದವನು
ಎಲ್ಲು ನಿಲಗೊಡದೆ
ಒಲವನಿರಿಸದೆ ಸಂದವನು
ರಮಿಸಿ ಛಲಬಿಡದೆ.
ತನ್ನ ದಾಹವು ನಿಲ್ಲುತಲಿ
ಬಿಟ್ಟು ಓಡಿಹನು
ಬೇರೆ ದೇಹವ ಮೆಲ್ಲುತಲಿ
ಮತ್ತೆ ಕೂಡಿಹನು.
ಕಣ್ಣು ಕಟ್ಟುತ ಮಗದೊಬ್ಬ
ಹಚ್ಚಿ ಹುಣ್ಣುಗಳ
ಕುಡಿಯ ಕಟ್ಟುತ ಹೋಗಿಹನು
ಹಲವು ಹೆಣ್ಣುಗಳ.
ಬಂಧಿಸೆನ್ನನು ಭೋಗಿಸಿದ
ಕರುಳು ಕಡಿವಂತೆ
ಚುಚ್ಚುಮಾತಲಿ ತಾಗಿಸಿದ
ಸರಳು ಸುಡುವಂತೆ.
ನಿನ್ನ ಪ್ರೀತಿಯ ಹೊಳೆಯಲ್ಲಿ
ಮಿಂದು ಕಳೆಯಾದೆ
ನೀನು ಬಿತ್ತಿದ ಬೆಳೆಯಲ್ಲಿ
ನಿಂದು ತಿಳಿಯಾದೆ.
ಬುಧವಾರ, ಮಾರ್ಚ್ 31, 2010
ಬಿಡದೀಮಾಯೆ
ಸುತ್ತಲೂ ಕಲ್ಲಿನ ಭದ್ರ ಆವರಣ
ಪಾಗಾರದ ಬಣ್ಣ ಕಾವಿ , ಮಡಿನೀರಿಗೊಂದು ಬಾವಿ.
ಬೇವು, ಬಿಲ್ವ,ಮುತ್ತುಗದ ಮರಗಳೇ ಸುತ್ತ
ಮಧ್ಯದಲ್ಲಿ ಎತ್ತರದ ಒಂದು ಹುತ್ತ
ಅಲ್ಲಲ್ಲಿ ತುಳಸಿ,ನೆಲ್ಲಿ ಪಾರಿಜಾತದ ಗಿಡಗಳು
ಅರ್ಚನೆಯಿಂದ ಕಂಗೊಳಿಸುವ ಬುಡಗಳು.
ತೇಲಿಬರುತ್ತಿರುವ ಭಕ್ತಿನಾಮದ ಇಂಪು
ಮಕರಂದ ಗಂಧವ ಉಜ್ಜುತ ಬೀಸುವ ಗಾಳಿಯ ತಂಪು
ಬೋಳುತಲೆಯ ವಟುಗಳ ಓಡಾಟ
ಮಂತ್ರಪಠಣದ ಪಾಠ.
ಹೊರಗೆ ಕವಿದಿದೆ ಭಕ್ತಿಯ ಮಂಜು
ಕಣ್ಣಿಗೆ ಕಾಣದ ನಂಜು
ಪೀಠ ಪಾಲಕ್ಕಿಗಳಲಂಕಾರ , ಹೊಮ್ಮುತ್ತಿದೆ ಓಂಕಾರ
ಪೀಠಕ್ಕೆ ಬಾಗಿಸಿಟ್ಟ ಮಂತ್ರದಂಡ
ಬಹುಪರಾಕಿಗೆ ನಿಂತ ಶಿಷ್ಯತಂಡ.
ಗುರುದರ್ಶನಕ್ಕೆ ಭಕ್ತರ ಸಾಲು,
ಅಲ್ಲಲ್ಲಿ ಹೊಳೆಯುತ್ತಿದೆ ವಿದ್ವಾಂಸರ ಶಾಲು.
ಮಣಿ, ಗಂಧ, ರುದ್ರಾಕ್ಷಿ - ಭಕ್ತಿಗೆ ಬೇಕೆ ಬೇರೆ ಸಾಕ್ಷಿ?
ಕಿವಿಗೆ ಅಪ್ಪಳಿಸುತಿದೆ ಭಕ್ತಿಯ ನದಿಯ ಭೋರ್ಗರೆತ
ಮುಕ್ತಿಯ ಮೊರೆತ.
ವಿಚಾರಿಗೂ ಬರುತ್ತದೆ ತಲೆತಿರುಕು
ಭಕ್ತಿಯ ಅಂಥ ಸರಕು!
ಆಶ್ರಮದ ತೇಜಸ್ಸಿನ ಸುಮುಖ
ನೋಡಿ ಕಾಮುಕನೂ ಆಗುವನು ವಿಮುಖ.
ಇಂತಿರಲು , ಪ್ರಾಕಾರದ ಒಳಗೆ ಬಂದಿದ್ದಾನೆ
ಒಬ್ಬ ಭಕ್ತ , ಪ್ರವೇಶ ಮುಕ್ತ .
ವೇದ ಶಾಸ್ತ್ರಗಳು ತಿಳಿದಿಲ್ಲ , ಜೀವನದಲೇನೂ ಉಳಿದಿಲ್ಲ
ಜಂಜಡಕೆ ಸಂಸಾರ ತ್ಯಜಿಸಿ ,ಮನದಿ ಸ್ವಾಮಿಯ ಭಜಿಸಿ
ಮುಕ್ತಿಗಾಗಿ ಬಂದಿದ್ದಾನೆ , ಮಠದೊಳಗೆ ನಿಂದಿದ್ದಾನೆ.
ಧ್ಯಾನಪೀಠದಲ್ಲಿ ಸ್ವಾಮಿ ಮಗ್ನ
ನಿಮಿರಿದ ಮೈ ನಗ್ನ
ನಾರಿಯಿಂದ ಮುಕ್ತಿಗೆ ದಾರಿ
ನಿರಂತರ ಮೈ ಒತ್ತು
ಉದುರುತ್ತಿರುವ ಮುತ್ತು.
ಹಗಲು, ತೆರಳಲು ಬೋಧನೆ
ರಾತ್ರಿ, ಕಾಮದ ವೇದನೆ
ರಾಸಲೀಲೆಗೆ ನಿವೇದನೆ ,
ಹಣದ ಅನುಮೋದನೆ.
ಪೀಠಬಿಟ್ಟು ಏರಿದ್ದಾನೆ ಮಂಚ
ತಲುಬಿನ ಪ್ರಪಂಚ
ಕುಪ್ಪಳಿಸುತ್ತಿದ್ದಾಳೆ ಸಿನೆಮಾ ತಾರೆ
ಜಾರುತ್ತಿದೆ ಆಕೆಯ ಸೀರೆ.
ಇಳಿಸಲವಳ ಉಬುಸ
ಕಳಚುತ್ತಿದ್ದಾನೆ ಕುಬುಸ
ಬೆಳಗಿ, ಅಣಿಮಾಡುತ್ತಾನೆ ಕಳಶವ ಕಾಮ ಪೂಜೆಗೆ.
ಧ್ಯಾನಪೀಠ - ಈಗ ಧಾನ್ಯಪೀಠ!
ಉತ್ತಲು , ಬಿತ್ತಲು ಹದಗೊಂಡಿದೆ ಗದ್ದೆ
ಶ್ರಮದ ಬೆವರಿಗೆ ಮೈ ಒದ್ದೆ.
ಹರಿಸಿ ನೋಟಿನ ಗರಿ
ಏರಿದ್ದಾನೆ ಪರಾಕಾಷ್ಠತೆಯ ಗಿರಿ
ಮುಗ್ಧಭಕ್ತರು ಯಾವಾಗಲೂ ಹರಕೆಯ ಕುರಿ.
ಕಾಮ ಕೊಸರಿತು ದಿಟ
ಕೆಸರಾಯಿತು ಮಠ.
ತೀರಿಸಿದ್ದಾನೆ ಅವಳ ಇಚ್ಚೆ
ಅಲ್ಲಿಗೆ ಸಂಪೂರ್ಣ ಉದುರಿತು
ನಿತ್ಯಾನಂದನ ಕಚ್ಚೆ.
ಇಷ್ಟಕ್ಕೂ , ಇಷ್ಟೆಲ್ಲಕ್ಕೂ ಅವನಿಗೆ ಮಠವೇ ಬೇಕಿತ್ತೆ?
ಬೇಕಿತ್ತು , ಬೆಲೆವೆಣ್ಣುಗಳ ಕರೆಸುವ ಅವನ ಮಠದ ತಾಕತ್ತು.
ಮುಕ್ತಿಗಾಗಿ ದರ್ಶನಕ್ಕೆ ಬಂದು ನಿಂತ
ಆ ಬಡಪಾಯಿ ವಿರಾಗಿ
ಓಡಿ , ಹೆಂಡತಿಯ ಪುನಃ ಸೇರಿ ಮರುಗಿ,
ನಿರ್ಧಾರಕ್ಕೆ ಬಂದಿದ್ದಾನೆ
ಬಿಡದೀ ಮಾಯೆ ಮಡದೀ ಕಾಯೆ.
ಗುರುವಾರ, ಮಾರ್ಚ್ 25, 2010
ಕಾವ್ಯ ಕಂಬನಿ

ಬುಧವಾರ, ಫೆಬ್ರವರಿ 24, 2010
ಸೋಲಾರ್ ವಾಟರ್ ಹೀಟರ್

ಅಸ್ಥಿರತೆಯ ವಿದ್ಯುತ್ತಿಗೆ
ಹೂಡಿ ಈಗ ತಂತ್ರವ
ಹಾಡಿ ಬೇಗ ಅಂತ್ಯವ.
ಧಕ್ಕೆ ಇಲ್ಲ , ರೊಕ್ಕವಿಲ್ಲ
ಬಿಸಿಲ ಹಿಡಿದು ಬಳಸಲು
ಹೆಚ್ಚು ಹಣವೂ ನಾಶವಾಗಿ
ವಿದ್ಯುತ್ ಬಿಲ್ ಕಟ್ಟಲು
ಸಿಟ್ಟು ಬಂದು ಮೆಟ್ಟಲು.
ನಿನ್ನೆ ಕಾದ ನೀರು ಇಂದು
ಪೂರ್ಣ ಬಿಸಿ ಇರುವುದು
ಅಡುಗೆ, ಸ್ನಾನ, ಬಟ್ಟೆ, ಪಾತ್ರೆ ,
ಮಾಡಿ ಮತ್ತೆ ತೊಳೆಯಲು
ಗೃಹ ಸಂಸ್ಥೆ ವಾಣಿಜ್ಯವೂ
ಸಾಕು, ಪಡದೆ ಅವಸ್ಥೆ
ಸಹಿಸಿ ದಹಿಸಿ ಸಾಕಾಗಿದೆ
ಕೊಳ್ಳಿ ಸೌರ ಸೆಟ್ಟನು
ಬುಧವಾರ, ಫೆಬ್ರವರಿ 17, 2010
ಒಂದು ಸಂಜೆ
ಕೆಂಪಿನ ಚೆಂಡು.
ತಾರೆಗಳ ಮಿಣುಕು,ಒಡವೆ
ಬರುತಿದೆ ಹಿಂಡು.
ಆಗಸದ ಮುಖದಿ, ಮೊಡವೆ
ಮುಗಿಲಿನ ತುಂಡು.
ಚೇತನಕೆ ಇನ್ನು ಜಡವೆ?
ದೃಶ್ಯವ ಕಂಡು.
ಜಿಗಿಯುತಿರೆ ಸಾಂಬ ಕಡವೆ
ಸವಿಯನುಂಡು
ಮಂಗಳವಾರ, ಫೆಬ್ರವರಿ 9, 2010
ಒಂದು ಬೆಳಗು
ಹಕ್ಕಿ ಹೂವಿನ ದಂಡೆ
ಗೌಜು ವಾಹನ ಶಬ್ದ
ಬಡಿದು ಎಬ್ಬಿಪ ಚಂಡೆ
ಕೆಲಸ ಬೆಟ್ಟವ ನೆನೆದು
ಕುದಿವ ದಿನದಾ ಮಂಡೆ
ಕಾಂಕ್ರೀಟು ಚಪ್ಪರದಿ
ಅಡಗಿ ಮಿರುಗುವ ತೊಂಡೆ
ಬಣ್ಣದೋಕುಳಿ ಚೆಲ್ಲಿ ಮತ್ತೆ
ಕರಗುವ ಹಂಡೆ
ನೀಲ ಬಯಲಲಿ ನಗುವ
ಜಗದ ದೇವನ ಕಂಡೆ
ಯಾವುದೂ ಗೋಜಿರದೆ
ಮಲಗಿಹವು ಕೆಲ ಬಂಡೆ
ಬೆಳಗು ಸೂರ್ಯನ ನೋಡು
ಒಮ್ಮೆಯಾದರು ಸಂಡೆ.

